Работа даследчага характару «Выкарыстанне краязнаўчага матэрыялу для складання і рашэння матэматычных задач»

У кожнага чалавека ёсць месца, дзе ён нарадзіўся — яго малая Радзіма. Мая малая Радзіма — вёска Бракава. Не ўсе мае аднакласнікі могуць пахваліцца тым, што добра ведаюць гісторыю нашай вёскі. Як вядома, гісторыя змяшчае ў сабе вельмі шмат розных падзей, дат, якія трэба ведаць і памятаць. Я думаю, каб лепш арыентавацца ва ўсіх гістарычных падзеях, каб лепей запомніць гістарычныя даты і разнастайныя дадзеныя, неабходна добра ведаць асновы матэматыкі.

На ўроках матэматыкі ў 5-7 класах даводзіцца рашаць вялікую колькасць тэкставых задач, адпрацоўваць вылічальныя навыкі. З дапамогай тэкставых задач мы атрымліваем вопыт працы з велічынямі, спасцігаем узаемасувязь паміж імі, атрымліваем вопыт ужывання матэматыкі да рашэння практычных задач. Задачы з краязнаўчым зместам робяць працэс навучання цікавым і займальным, аблягчаюць засваенне навучальнага матэрыялу. Разнастайныя задачы з краязнаўчым зместам падтрымліваюць і ўзмацняюць цікавасць да вучэбнага прадмета матэматыцы.

Веды вучняў пра гісторыю роднага краю, вытокі станаўлення і развіцця вобразаў роднай прыроды адыгрываюць важную ролю ў патрыятычным выхаванні падрастаючага пакалення.

Сёлета Магілёўскі раён адзначае 100-годдзе з дня ўтварэння, таму я вырашыў сабраць краязнаўчы матэрыял аб сваёй вёсцы Бракава і адлюстраваць яго ў задачах.

Мэта даследавання:

• складанне і рашэнне задач з краязнаўчым матэрыялам;
• дэманстрацыя значнасці матэматычных ведаў у практычнай дзейнасці.

Задачы:

• прааналізаваць навукова-даведачную літаратуру па гэтым пытанні; скласці матэматычныя задачы з выкарыстаннем краязнаўчага матэрыялу;
• скласці памятку па стварэнні матэматычных задач; прадэманстрыраваць значнасць матэматычных ведаў у практычнай дзейнасці.

Аб’ект даследавання: гістарычны матэрыял вёскі Бракава.

Прадмет даследавання: краязнаўчы матэрыял у матэматычных задачах.

Гіпотэза: прымяненне краязнаўчага матэрыялу дапаможа ў развіцці ўменняў рашэння матэматычных задач; уменне складаць і рашаць матэматычныя задачы пашырыць нашы веды пра гісторыю роднай вёскі і яе аколіцы.

Актуальнасць: прывіваць цікавасць вучняў да вывучэння матэматыкі праз складанне і рашэнне задач з выкарыстаннем гістарычнага матэрыялу вёскі Бракава.

Метады даследавання:

• збор і аналіз інфармацыі па тэме даследавання;
• абагульненне інфармацыі аб гісторыі роднага краю, выкарыстоўваючы рэсурсы школьнага музея і іншыя інфармацыйныя рэсурсы;
• работа з задачамі са школьнага курса.

У маёй працы прыведзены асобныя факты з гісторыі роднай вёскі, якія прадстаўлены ў школьным музеі. У нашым музеі сабраны разнастайны гістарычны матэрыял. У раздзеле аб Вялікай Айчыннай вайне захоўваюцца звесткі аб земляках, якія ваявалі ў гады ВАВ, хто быў у партызанах, падпольных групах. Быў сабраны матэрыял пра тое, як жылі нашыя землякі ў гады акупацыі, які ўклад зрабілі ў аднаўленне разбуранай гаспадаркі франтавікі, якія вярнуліся пасля Перамогі ў сваю вёску.

Калі выкарыстоўваў гістарычны матэрыял, то мной былі складзены матэматычныя задачы, змест якіх заснаваны на канкрэтных гістарычных фактах. Гэтыя задачы на прымяненне дзеянняў з натуральнымі лікамі, на знаходжанне працэнтаў ад ліку, на вылічэнне змянення велічыні ў працэнтах, на складанне і рашэнне прапорцыі, ураўненняў. Задачы на вылічэнне маштабу, плошчы і іншыя.